مواطن يبعث برسالة مؤثرة جدا للقوات المسلحة إحنا في الكلاكلة خلآص إنتهينا وفقدنا الامل والعفو والعافية وتفاعل كبير معه الي التفاصيل
دكش نيوز _ مصادر
نداء استغاثة عاجل جداً إلى القوات المسلحة
ياجماعه احنا في الكلاكلة القبة شارع 15 مربع 4 الدعم السريع دخل الحي كامل ودخل بيوتناً
احنا الآن محاصرين ماقادرين نطلع من بيوتنا منعونا من الصلاة في المسجد ياجماعه احنا محاصرين تماماً من البيت شبر ماقادرين نطلع نهائي اي شخص يطلع من بيتو قاعد يتعرض للضرب والاعتداء الجسدي
اقتحموا جميع بيوت جيرانا احنا قاعدين حامين بيتونا من النهب والسرقه منهم وبعد كدا بجوا علينا في البيت بدقو الباب تفتح ليهم خلاص مافتحت يقتحمو البيت انا شخصياً دخلوا علي البيت اكثر من مره وحصل معاي موقف امس الظهر حاولت افتش عن فرن فاتح اشوف عيش لاقوني في الشارع قالي المطلعك من بيتك شنو ووقعوا فيني ضرب في الوجهه وقالي تاني مانشوفك في الشارع
كل الشباب الموجودين في الحله اتعرضوا لحالات ضرب مبرح
إحنا الآن والله العظيم ماقادرين ناكل اليوم كامل غير باقي عيش ناشف ودخل فيهو النمل والله العظيم بس اكلناهو مافي شيء تاني في البيت والكهرباء لينا 36 يوم بدون كهرباء بدون مويه
الدعم السريع من الصباح إلى الدنيا تمسي بيسرق في البيوت ويضرب الرصاص العشوائي حتى تلفوناتنا ماقادرين نلقى محل نشحن عشان نواصل اهلنا وذوينا وصلوا رسالتنا ياجماعة ارجو توصلوها بالنيابه عننا للقوات المسلحة بالتدخل العاجل لفك الحصار المفروض علينا داخل منازلنا والله لاقادرين نطلع نشتري ابسط الاشياء العيش
مافي بقاله فاتحه مافي فرن فاتح بعد دخول الدعم السريع منعوا اي حاجه وحتى سوق اللفه احنا ماقادرين نصل ونتحرك من البيت بسبب تهديدهم والله وحايمين باسلحتهم حوالين بيوتنا
اعتبرونا اخوانكم والله ماعايزين اي مساعده ماديه والله غير بس توصلوا رسالتنا دي للقوات المسلحة
حسبنا الله ونعم الوكيل
